Pedimos a realización de melloras no Club de Remo de Cabo de Cruz

O Club de Remo de Cabo de Cruz é un referente no eido deportivo, non só para o noso concello, senón tamén no ámbito galego e estatal ao formar parte da elite deste deporte coa súa participación na liga de máximo nivel do Estado Español (ACT). O esforzo deportivo que realiza este club non é acorde coas instalacións nas que ten que realizar a súa actividade. As limitacións de espazo, os problemas de humidades e a inexistencia dun foso para adestrar son eivas que levan arrastrándose durante moitos anos e que vai sendo hora de buscarlle unha solución.

As instalacións actuales son claramente deficitarias

 

Do mesmo xeito, tamén hai que salientar o gran traballo que esta entidade realiza a diario nas categorías base deste deporte en Boiro, cunha aposta decidida pola  canteira como eixe central da súa política deportiva así como unha política de impulso ao deporte feminino punteira en toda Galicia. Contar cunhas instalacións dignas é prioritario para poder seguir avanzando nestes obxectivos.

No ámbito deportivo do noso concello existe unha necesidade prioritaria de acometer unha actuación integral no tocante ás instalacións das que dispón o Club de Remo de Cabo da Cruz para a súa actividade deportiva.  A construción das instalacións existentes data de principios dos anos oitenta e pese as distintas actuacións que se levaron a cabo nos últimos anos, non reúne as condicións mínimas coas que debe contar un club deste nivel

A Deputación Provincial da Coruña, ven de aprobar recentemente o Plan Único de Obras nos Concellos da Coruña para o ano 2017, correspondéndolle ó Concello de Boiro unha subvención total de 1.154.421,86 €, cuxo fin, entre outros, é  a realización de obras de interese xeral nos concellos da provincia da Coruña. Dende Boiro Novo, instamos ao goberno municipal a incluír dentro deste plan unha actuación integral nas instalacións do club de remo de Cabo da Cruz que contemple as necesidades desta entidade. 

 Rolda de prensa nas instalacións do Clube de Remo

A continuidade do PP no goberno pon en risco o medio de vida da xente do mar.

   Os pantaláns de Cabo de Cruz, que tiñan que estar colocados antes do fin desta lexislatura, son outra das promesas incumpridas do goberno de Alberto Núñez Feijoó e Juan José Dieste. Onte estivemos con Juan Fajardo, candidato de En Marea e deputado de AGE, para recordar o lesivas que foron as políticas do PP para sector pesqueiro, bateeiro, e marisqueiro de Galicia e concretamente do noso concello.

 

 Juan Fajado xunto con integrantes de Boiro Novo no Porto de Cabo de Cruz  

 

 Os pantaláns do Porto de Cabo de Cruz: máis de 5 anos de promesas incumpridas

   Ademáis de recordar como asuntos tan importantes coma a Lei de Acuicultura que seguen estando nun caixón do PP á espera de que pasen ás eleccións para poder vender as nosas rías ao mellor postor, tamén recordamos como xa van 5 anos dende a primeira vez que o PP de Núñez Feijoó e do alcalde Juan José Dieste prometeran que ían ter instalados os pantalans no porto crucense. 

   Esta promesa, que foi repetida en cada período electoral que houbo dende o 2011, semella unha burla para os e as traballadoras do mar do noso concello. A realidade é que novamente remata outra lexislatura e o Porto de Cabo de Cruz seguen sen contar con esta infraestructura tan necesaria para os e as usuarias do mesmo. Tan só unha nota nunha partida presupostaria que non chega nin para a décima parte do custe da súa instalación e que a estas alturas, sen tan sequera ter posto o primeiro pilote, moito nos tememos que novamente volte a quedarse en mera propaganda electoral.

Máis de 5 anos dende a 1ª data fixada polo PP para a instalación dos pantaláns

   É por iso que dende Boiro Novo estamos fartos de que o PP continúe xogando coa boa fe da xente do mar e cremos que esta burla ten que rematar dunha vez. Tiveron dúas lexislaturas para cumprir cun dereito que ten a veciñanza crucense quedando claro unha vez máis a súa incompetencia para xestionar o público demostrando que non merecen seguir gobernando este país e este concello.

Pancarta posta por Boiro Novo exixindo que o PP deixe de facer campaña cos dereitos da xente do mar